काठमाडौं । पद्मकन्या क्याम्पसको स्वतन्त्र विद्यार्थी युनियन (स्ववियु) को सभापतिमा स्वतन्त्र उम्मेदवार भुपी ऐर निर्वाचित भएकी छन् । 

बिहीबार भएको निर्वाचनमा नेपाली कांग्रेसनिकट विद्यार्थी संगठन नेपाल विद्यार्थी संघलाई पराजित गर्दै बागी उठेकी ऐर निर्वाचित भएकी हुन् । 

नेविसंघले पद्मकन्यामा पूर्णिमा परियारलाई उम्मेदवार बनाएको थियो । तर, बागी उम्मेदवारी दिएकी ऐर प्यानलैसहित निर्वाचित भएकी हुन् ।

अन्तिम मतपरिणामअनुसार ऐरले ७३० मत पाएकी छन् भने नेविसंघकी पूर्णिमा परियारले ३७९ मत प्राप्त गरिन् ।

सचिव पदमा ऐर प्यानलकै सन्ध्या बस्याल ६९५ मतसहित र कोषाध्यक्षमा संकल्पिका थापा ६६६ मतसहित निर्वाचित भए।

 सदस्य पदहरूमा उर्वशी पाण्डे, चेतना नहर्की, अस्मिता विक, स्वस्तिका विष्ट, आशु चौधरी, आकृति पाण्डे, निशा कार्की र यानसु कटुवाल चुनिएका छन् ।