कैलाली । सुदूरपश्चिम प्रदेश प्रमुख नजिर मियाँ र लुम्बिनीका प्रदेश प्रमुख कृष्णबहादुर घर्ती मगरबीच आज सुदूरपश्चिम प्रदेश प्रमुख कार्यालय धनगढीमा भेटवार्ता भएको छ।

भेटमा उहाँहरूबीच संविधानले दिएको अधिकारमा रहेर अन्तर प्रदेश समन्वय गर्ने, असल र राम्रा कामको अनुसरण गर्नेलगायत विषयमा कुराकानी भएको सुदूरपश्चिम प्रदेश प्रमुखको कार्यालयले जनाएको छ।

केही दिन पहिले सुदूरपश्चिम प्रदेशका प्रमुख मियाँले लुम्बिनी प्रदेश प्रमुखलाई सुदूरपश्चिम भ्रमणको निम्तो दिनुभएको थियो। सोही निम्तो स्वीकार गर्दै लुम्बिनी प्रदेश प्रमुख सुदूरपश्चिम भ्रमणमा आएका हुन्। लुम्बिनी प्रदेश प्रमुखले शनिबार कञ्चनपुरको दोधारा चाँदनीलगायतको क्षेत्रको भ्रमण गर्ने कार्यतालिका रहेको जनाइएको छ। 

सुदूरपश्चिम प्रदेशका प्रदेश प्रमुख मियाँले भ्रमणमा आएका लुम्बिनी प्रदेशका प्रमुखलाई सुदूरपश्चिमबारे जानकारी गराए। प्रदेश प्रमुख कार्यालयमा स्वागत गर्दै सुदूरपश्चिम प्रदेश प्रमुख मियाँले मायाको चिनो प्रदान गरे भने लुम्बिनी प्रदेश प्रमुखले पनि सुदूरपश्चिम प्रदेश प्रमुखलाई मायाको चिनो प्रदान गरेका थिए।रासस