धनगढी । सुदूरपश्चिम विश्वविद्यालय अन्तर्गतको कैलालीको अत्तरियामा रहेको दुर्गालक्ष्मी बहुमुखी क्याम्पसको स्वतन्त्र विद्यार्थी युनियन (स्ववियु) निर्वाचन विवादित बनेको छ । समानुपातिक उम्मेदवारीका विषयमा परेको दाबी विरोधमा निष्कर्ष ननिस्किएपछि विवाद भएको हो ।

सोमबार परेको समानुपातिक उम्मेदवारीमा अखिल सयुक्तले प्रक्रिया मिचेको भन्दै दाबी विरोधको निवेदन परेको थियो । दाबी विरोध उपर मंगलबार साँझ ५ बजे सम्म छानबिन गर्नुपर्नेमा सहमति नभएपछि विवाद भएको हो ।

निर्वाचनका लागि चैत्र १२ गते ९ वटा संगठन दर्ता भएका थिए । पछि उम्मेदवारीको बेला ५ संगठन मिलेर अखिल सयुक्तबाट प्रत्यक्ष र समानुपातिक उम्मेदवारी गर्दा गराएका थिए । तर समानुपातिकमा दल दर्ता नभएको अखिल सयुक्तबाटै उम्मेदवारी दर्ता गरिनु अवैध भएको भन्दै खारेज गर्नुपर्ने भन्दै दाबी विरोधमा माग गरिएको छ ।

नेविसंघका एलआर ओझाले अवैध रूपमा गरिएको समानुपातिक उम्मेदवारी खारेज गरिनुपर्ने माग गर्दै दाबी विरोध दर्ता गरेका थिए । मंगलबार बिहान १० देखि १ बजे सम्म दाबी विरोधको समय तोकिएको थियो । उक्त दाबी विरोधका विषयमा ५ बजे सम्म दाबी विरोध टुङ्गो लगाएर अन्तिम नामावली प्रकाशन गर्नुपर्ने कार्यतालिका भए पनि सहमति नहुँदा उक्त कार्यतालिका प्रभावित भएको छ ।

निर्वाचन अधिकृत लोक बहादुर महराले कानुनी जटिलता आएकाले सहमति हुन नसकिएको बताए । उनले बुधवार कानुन विज्ञ सहितको छलफल गरेर टुङ्गोमा पुग्ने बताए ।

नेविसंघका उम्मेदवार भुवन महराले भने कानुन विपरीत समानुपातिक उम्मेदवारी गर्दा गर्नु नै अवैध भएको भन्दै खारेज गरिनुपर्ने बताए । उनले समानुपातिक उम्मेदवारी दर्ता भएका संगठनका आधारमा हुने भएकाले पछि बनेको गठबन्धनबाट दर्ता भएको उम्मेदवारी खारेज गरेर निर्वाचन प्रक्रिया अगाडि बढाउनु पर्ने बताए ।

अखिल सयुक्तका बम बहादुर विकले आफूहरूले ११ जना मात्रै लड्नुपर्ने र विपक्षीले १९ जना लड्ने कुरा स्वीकार्य नहुने बताए । उनले विगत देखि हुँदै आएको अभ्यास अनुसार उम्मेदवारी दर्ता गरेको बताए । उनले ५ संगठन मिलेर चुनाव लड्दा आवश्यक सबै प्रक्रिया पुरा गरेर समानुपातिक र प्रत्यक्षको उम्मेदवारी दर्ता गरेको भए पनि अनावश्यक बखेडा झिकिएको बताए ।

सोमबार स्ववियुको नयाँ नेतृत्व चयनका लागि संयुक्त अखिल र नेपाल विद्यार्थी संघ (नेविसंघ) ले प्यानल सहित उम्मेदवारी दर्ता गरेका छन् । जसमा समानुपातिकका लागि ८–८ जनाको उम्मेदवारी परेको छ ।

५ विद्यार्थी संगठन मिलेर बनेको संयुक्त अखिल प्यानलबाट स्ववियु सभापतिमा अखिल क्रान्तिकारीका बम बहादुर विकले उम्मेदवार दर्ता गराएका छन् । जसको सचिवमा अनेरास्ववियुका गणेश नाथ योगीले उम्मेदवारी दिएका छन् भने कोषाध्यक्षमा अनेरास्ववियुकै दीपिका जोशीले उम्मेदवारी दर्ता गराएकी छन् । उक्त प्यानलमा समाजवादी, वैद्य, विप्लव, अखिल छैटौँका उम्मेदवारहरूले पनि मनोनयन दर्ता गराएका छन् । सदस्यमा नीरज मडै, डम्मरी ओली, भागरथी खड्का, कमला कुमारी दर्लामी, सोहित खनाल, धिरज बोकटी र सावित्री कामी रहेका छन् ।

यस्तै नेविसंघबाट सभापतिमा भुवन महराले उम्मेदवारी दर्ता गरेका छन् । सचिवमा ज्योति शाहु र कोषाध्यक्षमा सोनिया शाहले उम्मेदवार दिएकी छन् । सदस्यमा बिपना कुँवर, विष्णु नेगी, तारा कुमारी भट्टराई, रोजिना खड्का, गोविन्द सिंह महरा, महेन्द्र खत्री, विवेक डगौरा र कल्पना साउँद रहेका छन् । सभापतिका उम्मेदवार भुवन यसअघिको निर्वाचनबाट स्ववियु सभापति निर्वाचन भएका थिए भने बम पनि यसअघि सचिवमा निर्वाचित भएका थिए ।

दुर्गालक्ष्मी बहुमुखी क्याम्पसमा हाल १ हजार १२८ जना मतदाता रहेका छन् । सुदूरपश्चिम विश्वविद्यालय अन्तर्गत चैत २७ गते स्ववियु निर्वाचन हुँदै छ ।