कञ्चनपुर । कञ्चनपुरमा रहेको सुदूरपश्चिम विश्वविद्यालयले पाँच आङ्गिक क्याम्पस थप्ने निर्णय गरेको छ । विश्वविद्यालयले सुदूरपश्चिमका विभिन्न ठाउँका पाँच क्याम्पसलाई आङ्गिक क्याम्पस बनाउने निर्णय गरेको हो । विश्वविद्यालयको विशेष साधारणसभाले बझाङका दुई, बैतडी, डडेल्धुरा र कञ्चनपुरका एकरएक क्याम्पसलाई आङ्गिक क्याम्पस बनाउने निर्णय गरेको विश्वविद्यालयका सूचना अधिकारी सन्तोष विष्टले जानकारी दिए ।

“कुलपति उपस्थित विशेष साधारणसभाले सुदूरका थप पाँच कलेजलाई आङ्गिक क्याम्पस बनाउने निर्णय गरेको छ”, उनले भने । उनका अनुसार कञ्चनपुरको झलारीस्थित कृष्ण बैजनाथ बहुमुखी क्याम्पस, डडेल्धुराको भीमदत्त बहुमुखी क्याम्पस, बैतडीको पुर्चौडी बहुमुखी क्याम्पस, बझाङको सुनकुडा बहुमुखी क्याम्पस र बझाङदीप बहुमुखी क्याम्पसलाई आङ्गिक क्याम्पस बनाउने निर्णय भएको हो ।

“यो विश्वविद्यालयको तर्फबाट भएको निर्णय हो, दरबन्दी स्वीकृतलगायत कुरा सरकारसँग जोडिएका छन्”, सूचना अधिकारी विष्टले भने, “ती प्रक्रिया टुङ्गो लगाउने गरी सरकारले निर्णय गर्नु आवश्यक छ ।” विसं २०७४ मा पनि विश्वविद्यालयले सुदूरपश्चिममा छ आङ्गिक क्याम्पस थप्ने निर्णय निर्णय गरेको थियो ।

सरकारले दरबन्दी स्वीकृत लगायतमा कुनै निर्णय नगर्दा ती क्याम्पस अझै सुदूरपश्चिम विश्वविद्यालय मातहत आउन सकेका छैनन् । विसं २०६८ मा स्थापना भएको सुदूरपश्चिम विश्वविद्यालयको एक केन्द्रीय क्याम्पस र १५ आङ्गिक क्याम्पस सञ्चालनमा छन् । सुदूरपश्चिम विश्वविद्यालयमा चार सय ९१ जना प्राध्यापक र एक सय ७९ कर्मचारी छन् । २३ हजार तीन सय ९९ विद्यार्थी विश्वविद्यालयमा अध्ययनरत रहेका छन् ।