दार्चुला । दार्चुलामा नेकपा (एमाले) का जिल्ला उपाध्यक्ष र नेपाली काँग्रेसका पूर्व जिल्ला सचिवबीच विवाद हुँदा लफडा भएको छ। बुधवार राति पौने ९ बजेतिर जिल्लाको महाकाली नगरपालिका ४ सुपथ मुल्य पसल अगाडि उनीहरुबीच झडप भएको हो।

जिल्ला प्रहरी कार्यालय दार्चुलाका अनुसार एमालेका जिल्ला उपाध्यक्ष चरनसिंह बुढाथोकी र काँग्रेसका पूर्व जिल्ला सचिव हरक बिष्टबीच झडप भएको हो। झडपका क्रममा बुढाथोकीले बिष्टमाथि ढुङ्गा प्रहार गरेको र उनको हात र खुट्टामा चोट लागेको बताइएको छ। बिना कारण आफूमाथि आक्रमण गरेको र आफू घाइते भएको बिष्टले बताए। यस्तै उनले आज प्रहरीमा बुढाथोकीविरुद्ध उजुरी दिने पनि बताए।

तर, उता बुढाथोकीले भने राति मदिरा सेवन गरेर अराजक गतिविधि गरिरहेको र होहल्ला गरेकोले सम्झाइबुझाइ मात्र गरेको दाबी गरे। उनले ढुङ्गा प्रहार नगरेको भन्दै आफूमाथि हात हालेपछि सम्झाएर घर पठाएको जनाए।

यस्तै जिल्ला प्रहरी कार्यालयले पनि घटनाबारे जानकारी आएको र दुबै पक्षलाई आज छलफलका लागि बोलाइएको जनाएको छ।