धनगढी । राष्ट्रिय युवा संघ नेपाल कैलालीको उपाध्यक्षमा धनगढीका डेबिड खड्का सर्वसम्मत चयन भएका छन् । शनिबार घोडाघोडी नगरपालिकाको सुखडमा सम्पन्न राष्ट्रिय युवा संघको नवौँ जिल्ला अधिवेशनबाट खड्का उपाध्यक्षमा सर्वसम्मत चयन भएका हुन् ।

विगत एक दशकदेखि राष्ट्रिय युवा संघको राजनीतिमा सक्रिय रहेका खड्काले धनगढी उपमहानगरपालिकाको नगर कमिटि कोषाध्यक्ष, जिल्ला कमिटि सदस्य तथा दुई कार्यकाल सचिवालय सदस्यका रुपमा समेत काम गरिसकेका छन् ।

नेकपा एमालेको नगर कमिटि सदस्य समेत रहेका उनी धनगढी उपमहानगरपालिका–४ को वडा इन्चार्जको जिम्मेवारीमा छन् । फुटबलका राष्ट्रिय खेलाडी समेत रहेका उनी फारवेष्ट फुटबल क्लबका सञ्चालक हुन् भने बास्केट बलको जिल्ला कोचका रुपमा पनि काम गरिसकेका छन् ।

ब्याटमिन्टनका पनि राष्ट्रिय खेलाडी रहेका खड्का लामो समयदेखि सामाजिक कार्यमा सक्रिय युवा हुन् । खड्काले आफूलाई राष्ट्रिय युवा संघको जिल्ला उपाध्यक्षको जिम्मेवारी प्रदान गर्न सहयोग गर्ने तथा भूमिका खेल्ने सबैलाई धन्यवाद दिएका छन् ।

उनले आफ्नो कार्यकालमा युवा संघलाई कैलालीमा थप बलियो बनाउनेगरी सबैसँग समन्वय र सहकार्य गरेर काम गर्ने प्रतिबद्धता समेत जनाएका छन् ।