धनगढी । कैलाली जिल्लाको कैलारी गाउँपालिका–८ का २२ वर्षीय सन्तोस चौधरीले करेन्ट लागेर गम्भीर घाइते हुँदै पनि अन्ततः पुनर्जन्म पाएका छन्। मंसिर ५ गते इन्टरनेटको लाइन मर्मतका क्रममा हाइटेन्सन बिद्युत् लाइनले छोएपछि उनी शख्त घाइते बनेका थिए। करेन्टको तीव्र प्रभावले उनको छातीसहित शरीरका संवेदनशील अङ्गका केही भाग जलेका थिए।

घटनापछि चौधरीलाई उपचारका लागि धनगढीका विभिन्न अस्पतालहरूमा पुर्‍याइएको थियो। तर प्रारम्भिक उपचार गर्ने चिकित्सकहरूले उनको अवस्था अत्यन्त गम्भीर रहेको भन्दै बच्ने सम्भावना कमजोर रहेको बताएका परिवारका सदस्यहरू बताउँछन्। यही निराशाजनक अवस्थाबीच अन्तिम आशाका रूपमा उनी कैलाली अस्पताल लगिएको उनका दाई अमृतलाल चौधरी बताउँछन्।

“कति अस्पतालले ‘बच्दैन’ भनेर फिर्ता पठाए, हामी धेरै निराश भयौँ। तर कैलाली अस्पताल आएका बखत भने चिकित्सकहरूले गम्भीर रूपमा उपचार थाल्नु भयो र अहिले मेरा भाइ चल्न–फिर्नसमेत थालेका छन्,” अमृतलालले भावना व्यक्त गर्दै भने, “कैलाली अस्पताल हाम्रा लागि मन्दिरजस्तै बन्यो। यहाँका चिकित्सकहरूले भाइलाई पुनर्जन्मै दिए। हामी अत्यन्त आभारी छौँ।”

कैलाली अस्पतालका चिकित्सकहरूको समर्पण, सघन उपचार तथा निरन्तर निगरानीकै कारण अहिले सन्तोसको स्वास्थ्य अवस्था सुधारोन्मुख छ। अस्पतालका अनुसार उनको जलेका भागको उपचार, इन्फेक्सन नियन्त्रण, तरल व्यवस्थापन तथा आवश्यक शल्यक्रियात्मक प्रक्रिया समयमै गरिएको थियो। करेन्ट लागेर गम्भीर घाइते भएका बिरामीलाई बचाउन सक्षम भएको यो घटना कैलाली अस्पतालको चिकित्सकीय क्षमताको महत्वपूर्ण उदाहरण बनेको छ।

अहिले सन्तोसले सामान्य रूपमा हिँडडुल गर्न थालेका छन् भने चिकित्सकहरूले निरन्तर फलोअपमा राखेर उपचार अघि बढाइरहेका छन्। परिवार, स्थानीयवासी तथा अस्पताल व्यवस्थापन सबैले यस सफल उपचारलाई जीवनरक्षक उपलब्धि मानिरहेका छन्।