धनगढी । नेकपा एमालेको ११औँ महाधिवेशनका लागि बैतडीबाट युवा कलस्टरमा गोविन्द गिरी सर्वसम्मत चयन भएका छन्। यस्तै उता बाजुराबाट नरेश रोकाया चयन भएका छन्।

उमेर हदबन्दीको कारण अनेरास्ववियुको नेतृत्वका लागि प्रतिस्पर्धा गर्न नपाएका अनेरास्ववियुका निवर्तमान उपाध्यक्ष गोविन्द गिरी बैतडीबाट महाधिवेशन प्रतिनिधि चयन भएका हुन्।

यस्तै लोकप्रिय मतसहित अनेरास्ववियु महासचिवमा निर्वाचित भएका तर ३२ वर्षको उमेर हद लागेपछि अध्यक्ष बन्न नपाएका रोकाया बाजुराबाट प्रतिनिधि चयन भएका हुन्।

उमेर हदका कारण अध्यक्ष हुन नपाएका उनी एमालेले सृजना गरेको उमेर हदको नयाँ कोटामा प्रतिनिधि चयन भएका छन्। जेनजी आन्दोलनपछि एमालेले सबै निर्वाचन क्षेत्रबाट ४० वर्षमुनिका युवा प्रतिनिधिको सहभागिता सुनिश्चित गरेको छ।

सोही अनुसार ११औँ महाधिवेशनका लागि बाजुराबाट सर्वसम्मत चयन भएका हुन्। काठमाडौंमा मङ्सिर २७ देखि २९ सम्म आयोजना हुने महाधिवेशनका लागि अहिले देशभर प्रतिनिधि चयन प्रक्रिया चलिरहेको छ।

बाजुराबाट सर्वसम्मत भएका रोकाया महाधिवेशनमार्फत पार्टी राजनीतिमा होमिने तयारी गरेका छन्। उनी निकटहरूका अनुसार रोकाया ११औँ महाधिवेशनमार्फत केन्द्रीय सदस्यको तयारी गरिरहेका छन्।