धनगढी । नेपाली कम्युनिस्ट पार्टीका संयोजक पुष्पकमल दाहाल प्रचण्डले आफूहरू बृहत् वामपन्थी एकताको पक्षमा रहेको बताएका छन्।

धनगढीमा आयोजित एकता सन्देश सभालाई सम्बोधन गर्दै १५ वटा वाम घटकलाई एक ठाउँमा ल्याएर आफूहरूले ऐतिहासिक काम गरेको बताएका छन्।  

उनले भने, ‘हाम्रो ध्यान एमालेतिर पनि छ, एमालेभित्रका सबै वामपन्थी, काँग्रेस भित्रका देशभक्त र क्रान्तिकारीहरू पनि यही पार्टीमा नै केन्द्रित हुनुपर्छ भन्ने जोड छ। सबैलाई अट्न सक्ने भएकाले नेपाली कम्युनिस्ट पार्टी राखेका हौँ। यहाँ अब कोही माओवादी छैन, अब कोही एकीकृत समाजवादी छैन।’

प्रचण्डले कम्युनिष्ट पार्टीमा पुच्छरको आवश्यकता नरहेको बताएका छन्। उनले सम्पूर्ण देशभक्त एकजुट हुनुपर्ने बताएका छन्। प्रचण्डले नेपाली काँग्रेसलाई समेत साथमै ल्याउनुपर्ने बताएका छन्। उनले गणतन्त्र पक्षधर, शान्ति सम्झौताका पक्षधर शक्ति एकजुट हुनुपर्ने बताएका छन्।