धनगढी । सुदूरपश्चिम प्रदेशमा उच्च शिक्षाको स्तर उकास्ने ऐतिहासिक कदमका रूपमा सोफान वेस्टर्न एकेडेमी (SWA College) ले औपचारिक रूपमा आफ्नो शैक्षिक यात्रा प्रारम्भ गरेको छ । काठमाडौँ विश्वविद्यालयबाट सम्बन्धन प्राप्त यो कलेजले पहिलो चरणमा (Bachelor of Social Work) ) BSW कार्यक्रम सुरु गर्दै सुदूरपश्चिममा गुणस्तरीय उच्च शिक्षाको नयाँ युगको सुरुवात गरेको हो ।

उद्घाटन समारोहका प्रमुख अतिथि तथा काठमाडौँ विश्वविद्यालयका मानविकी तथा व्यवस्थापन संकायका डिन प्रा. डा. उद्दब प्याकुरेल ले SWA College को यो पहललाई “प्रदेशमा शिक्षाको पुनर्जागरण” भन्दै स्वागत गर्नुभयो। उहाँका अनुसार, “सुदूरपश्चिम जस्तो सम्भावनायुक्त भूभागमा अब विद्यार्थीहरूलाई काठमाण्डौ नगई नै अन्तर्राष्ट्रिय स्तरको शिक्षाको अनुभव लिन सक्ने बाटो खुलेको छ।”

कार्यक्रममा कलेजका निर्देशक शैलेश सिंह ले SWA College लाई “शिक्षा र रोजगारीबीचको पुल”को रूपमा परिभाषित गर्दै भन्नुभयो — “हामी केवल पढाइ होइन, सोच बदल्ने शिक्षाको वातावरण निर्माण गर्दैछौं। सामाजिक कार्य र मनोविज्ञानको संयोजनले प्रदेशको मानसिक, सामाजिक र आर्थिक रूपान्तरणमा योगदान र्पुयाउनेछ।”
उद्घाटन कार्यक्रममा स्थानीय शिक्षाप्रेमी, बुद्धिजीवी, अभिभावक र विद्यार्थीहरूको उल्लेखनीय उपस्थिति थियो। वक्ताहरूले काठमाडौँ विश्वविद्यालयको सम्बन्धनले सुदूरपश्चिमका विद्यार्थीहरूका लागि ‘काठमाडौँ नपुगी काठमाडौँ स्तरको शिक्षा’ प्राप्त गर्ने अवसर खुलेको बताएका थिए।

भविष्यमा Management, Information Technology, लगायतका विषयहरू सुरु गर्ने तयारी गरिरहेको छ । अत्याधुनिक प्रयोगशाला, अनुभवी शिक्षकमण्डल, र अन्तरक्रियात्मक शिक्षण विधिले यस कलेजलाई प्रदेशकै नमुना बनाउने अपेक्षा गरिएको छ।

सुदूरपश्चिमका युवाहरू अब आफ्नै प्रदेशमै विश्वस्तरीय शिक्षाको सपना साकार पार्ने बिश्वास लिइएको छ ।