चैतन्य पाठशालाद्वारा राष्ट्रिय क्रिकेट खेलाडीहरूलाई सम्मान
धनगढी । धनगढीको चैतन्य पाठशालाले राष्ट्रिय खेलाडीहरूलाई सम्मान गरेको छ। स्थापना कालदेखि नै सामाजिक सेवा तथा प्रतिभाहरूलाई सम्मान गर्दै आइरहेको पाठशालाले बिहीबार खेलाडीहरूलाई सम्मान गरेको हो।
पाठशालाले पाँच जना क्रिकेट खेलाडी कुशल भुर्तेल, लोकेश बम, ललित राजवंशी, विनोद भण्डारी र सन्दीप जोरालाई एक समारोहबिच सम्मान पत्रसहित जनही दश हजार नगद प्रदान गरी सम्मान गरेको हो।
पाठशालाको विहानी सत्रमा गरिएको उक्त समारोहमा खेलाडीहरूले विद्यार्थीहरु माझ आफ्ना अनुभवहरू सुनाएका थिए। क्रिकेटर कुशल भुर्तेलले सफलता प्राप्तिका लागि अनुशासनको ठूलो महत्व र इच्छाशक्ति भए जीवनमा जुनसुकै क्षेत्रमा सफलता हासिल गर्न सकिने कुरा विद्यार्थीहरुलाई बताएका छन् । यस्तै क्रिकेटर लोकेश बमले पनि नेपाली खेलको क्षेत्रमा यस पाठशालाबाट पनि खेलाडी जन्मिने छन् भनी शुभकामना व्यक्त गरेका थिए।
साथै पाठशाला परिवारप्रति खेलाडी समूहले यो सम्मानले आफूहरुलाई थप हौसला मिलेको भनी धन्यवाद ज्ञापन समेत व्यक्त गरेका छन्। कार्यक्रममा बोल्दै विद्यालयका अध्यक्ष गणेशप्रसाद जोशीले आजका बालबालिकालाई किताबी ज्ञान मात्रै नभई रुचि अनुसारको क्षेत्रमा अग्रसर गराउनु पर्ने भएकाले विद्यालयले सोही अनुसार काम गरिरहेको बताए।
विद्यालयका प्रधानाध्यापक कटकबहादुर सिँहले धन्यवाद ज्ञापन गर्दै विद्यालयले विद्यार्थीमैत्री वातावरण दिएको र चैतन्य स्पोर्ट्स एकेडेमीबाट खेल जगतमा राम्रा प्रतिभा उजागर गर्ने बताए। नेपाली क्रिकेटप्रेमीहरूको मन जित्न सफल भएका क्रिकेट टोलीसँग प्रत्यक्ष साक्षात्कार गर्न पाउँदा विद्यार्थीहरु निकै उत्साहित भएका थिए ।
प्रतिक्रिया