धनगढी । नेकपा एमालेबाट निष्कासन भएका पुर्व उपाध्यक्ष भिम रावल गृह प्रदेश आएका छन् । एमालेबाट निस्काशन भएपछि पहिलो पटक आज रावल गृह प्रदेश आएका हुन् । आज बिहान साढे ८ बजेको श्री एयरलाइन्सको जहाजमार्फत धनगढी ओर्लिएका हुन् । उनलाई स्वागत गर्न समर्थकहरु धनगढी विमानस्थल पुगेका थिए । सो क्रममा प्रधानमन्त्री तथा एमाले अध्यक्ष केपी शर्मा ओलीविरुद्ध नारावाजीसमेत भएको थियो । उनी आजै गृहजिल्ला अछाम प्रस्थान गर्ने कार्यतालिका छ ।

उनले शनिबार रामारोशन गाउँपालिकामा आयोजना हुन लागेको राष्ट्रपति रनिङ्ग शिल्ड छनोट प्रतियोगिताको उद्घाटन गर्ने छन् । धनगढी पुगेका नेता रावललाई उनका समर्थकहरूले धनगढी विमान स्थलमा स्वागत गरेका छन् । उनको पक्षमा जिन्दावादका नारा लगाएका उनका समर्थकले एमाले अध्यक्ष एवं प्रधानमन्त्री केपी शर्मा ओलीविरुद्ध मुर्दावादको नारासमेत लगाएका थिए ।

भ्रमणको क्रममा नेता भीम रावलले आफ्ना समर्थकहरूलाई भेटघाट गर्ने र अत्तरियामा आयोजित कार्यक्रमलाई सम्बोधन गर्ने कार्यतालिका छ । सो कार्यक्रम सकेपछि उनी अछाम जानेछन् ।

यस्तै नेता रावलसँगै एमालेका स्थायी कमिटी सदस्य कर्ण थापा पनि धनगढी आएका छन् । काठमाडौंबाट धनगढीसम्म एमाले नेता थापा र नेता रावलसँगै सिटमा बसेर पुगेका थिए ।

केही समयअघि नेता रावल र थापाको दुरी बढेको थियो । तर पछिल्लो समय नेता रावललाई एमालले निष्कासित गरेपछि थापा त्यसको विरोधमा उत्रिएका थिए । नेता रावलले आफ्नो नेतृत्वमा पार्टी स्थापना गर्दै छन् । बिहीबार मात्र उनले पार्टीको नाम र अवधारणापत्र सार्वजनिक गरेका थिए । उनको पार्टीको नाम मातृभूमि जागरण अभियान नेपाल रहनेछ ।