काठमाडौँ। पूर्व उपप्रधानमन्त्री एवं गृहमन्त्री डा. भीम रावलले नयाँ राजनीतिक पार्टी ‘मातृभूमि जागरण अभियान, नेपाल’ गठनको घोषणा गरेका छन्। नेकपा एमालेबाट निष्कासनपछि उनले बिहीबार सामाजिक सञ्जालमार्फत आफ्नो पार्टीको अवधारणा र संगठनात्मक संरचना सार्वजनिक गरेका हुन्।

डा। रावलका अनुसार पार्टीले वडा, पालिका, प्रदेशदेखि केन्द्रसम्म संगठन विस्तार गर्नेछ। प्रत्येक तहमा भेला गराई १५ देखि २५ सदस्यीय समिति गठन गरिनेछ। आवश्यकता अनुसार भेलामा सहभागी सदस्यहरूको संख्याले परिषद् गठनको आधार तय गर्ने उनले बताएका छन्।

पार्टीका उद्देश्य र प्राथमिकता
डा. रावलले आफ्नो पार्टीले राष्ट्रिय स्वाभिमान, सामाजिक न्याय र आर्थिक समृद्धिलाई मूल एजेन्डा बनाउने बताए। उनले पार्टीलाई पारदर्शी, इमानदार र जनमुखी बनाउने प्रतिबद्धता व्यक्त गर्दै, नयाँ पुस्ताको नेतृत्व विकासमा विशेष जोड दिने बताएका छन्।

संगठनात्मक संरचना
पार्टीको संगठनात्मक संरचना वडा स्तरदेखि केन्द्रसम्म समावेशी र क्रियाशील रहने छ। पार्टीको नेतृत्व पद्धति लोकतान्त्रिक प्रक्रिया मार्फत हुनेछ भने संगठनलाई मजबुत बनाउन आन्तरिक प्रशिक्षण र छलफललाई प्राथमिकता दिइने छ।

राजनीतिक वृत्तमा हलचल
डा. रावलको यो घोषणाले राजनीतिक वृत्तमा व्यापक चासो र चर्चा जन्माएको छ। उनका समर्थकहरूले यो कदमलाई नयाँ राजनीतिक विकल्पका रूपमा स्वागत गरेका छन् भने आलोचकहरूले यो चुनौतीपूर्ण यात्रा हुने बताएका छन्।

डा. रावलको नेतृत्वमा स्थापना भएको ‘मातृभूमि जागरण अभियान, नेपाल’ ले आगामी दिनमा कस्तो प्रभाव पार्नेछ भन्नेमा आम चासो रहेको छ। पार्टीले अबको केही दिनमा आफ्नो विस्तृत कार्ययोजना सार्वजनिक गर्ने तयारी गरिरहेको बताइएको छ।