धनगढी । धनगढी उपमहानगरपालिका स्तरीय १५ औँ राष्ट्रपति रनिङ्ग शिल्ड प्रतियोगिताको उपाधि सरस्वती माध्यमिक विद्यालय मनेहराले हात पारेको छ ।

प्रतियोगितामा १५ स्वर्ण सहित ८ रजत र ७ कास्य गरी ३० पदक जितेर सरस्वती माविले उपाधि हात पारेको हो ।

प्रतियोगितामा त्रिनगर माध्यमिक विद्यालय दोस्रो र एरिस्टो मावि, क्याम्पस चोक तेस्रो स्थान हासिल गरेका छन् । त्रिनगरले १४ स्वर्ण, ११ रजत र ८ कास्य गरी ३३ पदक जितेको छ । एरिस्टो माविले ७ स्वर्ण, १ रजत ३ कास्य गरी १३ पदक जितेर तेस्रो स्थान हासिल गरेको हो ।

धनगढी उपमहानगरपालिकाका उप–प्रमुख कन्दकला कुमारी रानाको अध्यक्षतामा नगर स्तरीय राष्ट्रपति रनिङ्ग शिल्ड प्रतियोगिता समापन कार्यक्रम गरिएको छ ।

समापन कार्यक्रममा बोल्दै उप–प्रमुख रानाले विद्यालय स्तरबाटै हुने प्रतियोगिताले खेल क्षेत्रमा महत्त्वपूर्ण भूमिका खेल्ने बताइन । उनले खेलकुदको विकासका लागि उपमहानगरपालिकाले महत्त्वपूर्ण भूमिका खेलेको बताइन । 

नगर स्तरीय राष्ट्रपति रनिङ्ग शिल्ड प्रतियोगितामा २६ सामुदायिक र १५ संस्थागत गरी ४१ वटा विद्यालयहरूको सहभागिता रहेको उनले बताइन ।

प्रतियोगितामा सामुदायिक विद्यालयका ८ सय ४० र संस्थागत विद्यालयका ३ सय १३ गरी १ हजार १ सय ५३ विद्यार्थी सहभागी रहेको थियो। 

प्रतियोगितामा भलिबल, कबड्डी, एथलेटिक्स, मार्सल आर्ट, तेक्वान्दो र उसुतर्फका इभेन्ट भएका थिए । प्रत्येक विधामा छात्र र छात्राले अलग–अलग प्रतिस्पर्धा गरेका थिए ।