धनगढी । धनगढी उपमहानगरपालिकाद्वारा आयोजित सामुदायिक विद्यालयहरुमा सम्पादित शैक्षिक गतिविधिको प्रस्तुतीकरणको आधारमा मंसिर महिनामा त्रिनगर मावि उत्कृष्ट भएको छ ।

बुधबार उपमहानगरपालिका द्वारा मासिक प्रधानाध्यापक बैठकको अवसरमा आयोजित कार्यक्रममा धनगढीमा रहेको त्रिनगर माध्यमिक विद्यालय उत्कृष्ट भएको हो ।

मंसिर महिनामा माध्यमिक तह कक्षा बालविकासदेखि कक्षा १२ सम्म सञ्चालित विद्यालयहरुमध्ये त्रिनगर माध्यमिक विद्यालय, धनगढी-१, त्रिनगर, कैलाली उत्कृष्ट विद्यालय हुन सफल भएकोले नगद  १० हजार सहित उपमहानगरपालिका द्वारा सम्मान पत्र प्रदान गरिएको विद्यालयका प्रधानाध्यापक भूपाल खड्काले बताएका छन् ।

यस्तै विद्यालयमा शैक्षिक गतिविधि सञ्चालन गरेर विद्यालयलाई उत्कृष्ट स्थानमा पुर्याउन सफल सम्पूर्ण शिक्षक, कर्मचारी, विद्यार्थी, विव्यस र शिक्षक अभिभावक संघ प्रति प्रधानाध्यापक खड्काले आभार व्यक्त गरेका छन् ।   

साथै विद्यालयको बृहत्तर विकासका लागि आगामी दिनमा पनि सबैको सक्रियता रहिरहनेछ भन्ने विश्वास गरेको उनले बताए ।