धनगढी । नागरिक उन्मुक्ति पार्टी सुदूरपश्चिम प्रदेश संसदीय दलका नेता फेरि परिवर्तन गरिएको छ । असार २९ गते बहुमत सदस्यको समर्थनमा खुसीराम डङ्गौरा थारुलाई संसदीय दलका नेता बनाइएको थियो । साता दिनभित्रै उहाँलाई हटाएर पुनः घनश्याम चौधरीलाई संसदीय दलका नेता चयन गरिएको छ । 

बहुमत सदस्यको समर्थनमा उहाँलाई फेरि संसदीय दलका नेता चयन गरिएको हो । यसै गरी, लक्ष्मण किशोर चौधरीलाई प्रमुख सचेतकमा चयन गरिएको छ । दलका नेता चयन गर्नका लागि घनश्याम चौधरी, रामेश्वर चौधरी, इन्दिरा गिरी र लक्ष्मण किशोर चौधरीको उपस्थिति देखिएको छ । 

सात जना प्रदेश सभा सदस्य रहेका नागरिक उन्मुक्ति पार्टीका तीन जना प्रदेश सभा सदस्य पार्टी संरक्षक रेसम चौधरी पक्षमा देखिएका छन् । यसै गरी, कैलाश चौधरी, टीका थापा र खुसीराम डङ्गौरा थारु पार्टी अध्यक्ष रन्जिता श्रेष्ठको पक्षमा देखिएका छन् । 

प्रमुख सचेतक लक्ष्मण किशोर चौधरीले आफू नागरिक उन्मुक्ति पार्टीको संस्थापक रहेका कारण तटस्थ बसेको बताए । खुसीराम डङ्गौरा थारुलाई संसदीय दलका नेता चयन गर्नसमेत समर्थन जनाउनु भएका उनले आफू कसैको पक्षमा नरहेका कारण जसको पक्षमा पनि हस्ताक्षर गर्न तयार रहेको बताए । 

“म हस्पिटल भर्ना भएको छु । यहाँ आएर हस्ताक्षर गराउँछन् । दलको नेता दिनकै फेरे पनि म सबैको पक्षमा हस्ताक्षर गर्न तयार छु”, उनले भने ।