धनगढी । प्रधानमन्त्री पुष्पकमल दाहाल प्रचण्डले सामाजिक न्याय र सुशासनमा सरकार दृढ रहेको बताएका छन् ।माओवादी नेता कृष्ण बढुवाल (महेश) को श्रद्धाञ्जली सभालाई सम्बोधन गर्दै प्रधानमन्त्री प्रचण्डले यस्तो बताए ।

बडुवाल सुदूर पश्चिम प्रदेश कमिटी उपाध्यक्ष हुन् । निमोनिया बाट ग्रसित बढुवालको असोज १० गते भारत उपचारका लागी लैजाने क्रममा निधन भएको थियो । आज प्रधानमन्त्री प्रचण्ड बढुवालको स्मृतिमा आयोजित शोक सभामा पुगेका थिए ।

उनले सामाजिक न्याय र सुशासनका काम गर्दै महेश जस्ता योद्धाहरूको सपना पूरा गर्ने लक्ष्यमा सरकार रहेको बताए ।

‘उहाँ जनताको लागि समाज रूपान्तरणको लागि क्रान्तिकारी योद्धा हुनुहुन्थ्यो । यो पुरै परिवार सामाजिक रूपान्तरणको आदर्श प्रस्तुत गरेको छ’ प्रधानमन्त्री प्रचण्डले भने ।

‘धैर्य गरेर महेशको सपना पूरा गर्नु पर्छ ।देशको निम्ति समाजको निम्ति राम्रो काम गरेर अगाडि बढ्नु नै महेश जस्ता योद्धाहरूप्रतिको सम्झना र सम्मान हो।’

महेशका दाजु कुम्भ बढुवालले भाइको स्मरण गर्दै सरकारले अझै राम्रो काम गर्नु पर्ने बताएका थिए । ‘निम्न वर्गका नागरिकका मुद्दा अझै बलियो ढङ्गले उठाउनु पर्छ । विकासलाई गति दिए भाइको सपना पूरा हुन्छ’ उनले भने ।

समाजवादी मोर्चाको सन्देश सभामा सहभागी हुन् प्रधानमन्त्री आज कैलाली आएका हुन् । धनगढीमा सन्देश सभा हुनु अघि प्रधानमन्त्री लम्की चुहा नगरपालिका पुगेका थिए ।