काठमाण्डौ । नेपाल प्रिमियर लिग (एनपीएल) क्रिकेटमा सुदूरपश्चिम रोयल्सले लगातार पाँच खेल जित्दै प्ले अफमा पुगेको छ । आज भएको खेलमा सुदूरपश्चिमले साविक विजेत जनकपुर बोल्ट्सलाई ६ विकेटले पराजित गरेको हो ।

जनकपुरले दिएको १ सय ४६ रनको लक्ष्य पछ्याएको सुदूरपश्चिमले १७ ओभर ४ बलमा ४ विकेट गुमाएर भेटायो । सुदूरपश्चिका इसान पाण्डेले ५६ र बिनोद भण्डारीले ४२ रन बनाए । जनकपुरका माज सदक्वट २, सञ्जय कृष्णमूर्ति र आदित्य महताले समान १ विकेट लिए । 

त्यसअघि कीर्तिपुरको त्रिवि क्रिकेट रङ्गशालामा टस जितेर ब्याटिङ गरेको जनकपुरले ८ विकेट गुमाएर १ सय ४५ रन बनायो । 

जनकपुरका सञ्जय कृष्णमूर्तिले ५० र जेन निकोल लफ्टि इटनले ३९ रन बनाए । सुदूरपश्चिमका अविनाश बोहराले ४, स्कट कुग्गेलिजनले ३ र दीपेन्दसिंह ऐरीले १ विकेट लिए । 

यो जीतसँगै सुदूरपश्चिम ५ खेलमा १० अङ्कसहित शीर्ष स्थानमा छ । लगातार चौथो खेलमा पराजित जनकपुर तालिकाको पुछारमा छ । 

एनपीएलमा आठ वटा फ्रेन्चाइज टोली सहभागी छन् । गएको मङ्सिर १ गतेदेखि शुरू भएको दोस्रो संस्करणको एनपीएल क्रिकेट यहि २७ गतेसम्म चल्नेछ ।