धनगढी। धनगढी उपमहानगरपालिकामा राष्ट्रपति रनिङ सिल्ड प्रतियोगिता आज बाट सुरु भएको छ । विद्यालयहरूबाट छानिएका विद्यार्थीहरूले भाग लिइरहेको प्रतियोगिता धनगढी रङ्गशालामा भव्य समारोहका बिच उद्घाटन गरिएको छ ।

प्रतियोगिताको धनगढी उपमहानगरपालिका नगर उपप्रमुख कन्दकला कुमारी रानाले उद्घाटन गरेकी हुन् । उद्घाटन कार्यक्रममा उपप्रमुखसँगै नगर कार्यपालिकाका सदस्यहरू, उपमहानगरपालिकाका कर्मचारीहरू, शिक्षक, विद्यार्थी, अभिभावक तथा स्थानीयहरूको उपस्थिति रहेको थियो । 

प्रतियोगितामा नगरभरिका २६ सामुदायिक र १५ संस्थागत गरी ४१ वटा विद्यालयहरूको सहभागिता रहेको छ । प्रतियोगितामा सामुदायिक विद्यालयका ८ सय ४० र संस्थागत विद्यालयका ३ सय १३ गरी १ हजार १ सय ५३ विद्यार्थी सहभागी भएका छन् । 

प्रतियोगितामा भलिबल, कबड्डी, एथलेटिक्स, मार्सल आर्ट, तेक्वान्दो र उसुतर्फका इभेन्ट हुने भएका छन्। प्रत्येक विधामा छात्र र छात्राले अलग–अलग प्रतिस्पर्धा गर्ने छन्।