काठमाडौं । सैफ जैबको सानदार ब्याटिङमा सुदूरपश्चिमले नेपाल प्रिमियर लिग एनपीएलमा लुम्बिनी लायन्सलाई १८८ रनको लक्ष्य दिएको छ ।

टीयू अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको सुदूरपश्चिमले निर्धारित २० ओभरमा ४ विकेट गुमाएर १८७ रन बनाएको हो ।

ओपनर जैबले ६१ बल खेल्दै ६ चौका र ५ छक्का मदतमा सर्वाधिक ९० रन बनाए । कप्तान दीपेन्द्रसिंह ऐरीले १९ बल खेल्दै ४ चौका र २ छक्का मदतमा अविजित ३९ रन बनाए । 

बलिङमा लुम्बिनीका लागि रामोन सिमोण्ड्सले ४ ओभरमा ३२ रन खर्चेर २ विकेट लिए । कप्तान रोहित पौडेल र विवेक यादवले १–१ विकेट लिए ।

पहिले ब्याटिङ गर्दै बनेको यो दोस्रो ठूलो स्कोर हो । यसअघि लुम्बिनी लायन्सले पहिले ब्याटिङ गर्दै विराटनगर किंग्स विरुद्ध १९१ रन बनाएको थियो । तर विराटनगरले उक्त लक्ष्य चेस गरेको थियो ।