काठमाडौँ । एसएमएस फ्रेन्डसिप त्रिकोणात्मक टी–२० सिरिजको उपाधि नेपालले जितेको छ। आइतबार भएको फाइनलमा नेपालले गुजरातलाई १८ रनले पराजित गर्दै उपाधि जितेको हो।

नेपालले पहिले ब्याटिङ गर्दै गुजरातसमक्ष १ सय ७७ रनको लक्ष्य प्रस्तुत गरेको थियो। जवाफमा गुजरात निर्धारित २० ओभरमा ८ विकेट गुमाएर १ सय ५८ रनमा समेटियो।

गुजरातका लागि कप्तान उमंग रोहित कुमारले ४० रन बनाउनु सर्वाधिक रह्यो। त्यस्तै आर्यन दतले ३६ रन तथा रुद्र मयुर पटेलले १७ रन बनाए। थप दोहोरो स्कोरका रुपमा जयमित पटेल र हर्स के देसाईले समान १५ रन बनाएका थिए। नेपालका लागि अभिनाश बोहराले ३ विकेट लिँदा दिपेन्द्र सिंह ऐरीले २ तथा करण केसी र कुशल मल्लले समान १ विकेट लिए।

त्यसअघि पहिले ब्याटिङ गरेको नेपालले निर्धारित २० ओभरमा ४ विकेट गुमाएर १ सय ७६ रन बनाएको थियो। नेपालका लागि कप्तान रोहित पौडेलले ४७ बलमा ५ चौका र ४ छक्काको सहयोगमा ७४ रन बनाए। त्यस्तै, कुशल मल्ल १३ बलमा २ चौका र २ छक्का प्रहार गर्दै ३१ रनमा अविजित रहे। त्यस्तै, कुशल भुर्तेल १९ रनमा आउट हुँदा आरिफ शेखले ३४ रन जोडेका थिए।

गुजरातका लागि सेन पटेल, तेजस पटेल, जला युवराजसिंह र जमित पटेलले समान १ विकेट लिएका थिए।

प्रतियोगितामा नेपालले गुजरातलाई तेस्रो पटक हराउँदै उपाधि जितेको हो। सिरिजको लिग चरणमा भएका दुवै खेलमा नेपालले गुजरातलाई हराएको थियो। नेपालले लिग चरणको पहिलो खेलमा ८ विकेटको जित निकालेको थियो भने दोस्रो खेलमा ८ रनको जित हासिल गरेको थियो।

त्यस्तै, अर्को टोली बरोडालाई पहिलो खेलमा २७ रनले हराएको नेपालले अन्तिम खेलमा भने बरोडासँग ३७ रनले पराजित हुन पुगेको थियो।

नेपालले अर्को सातादेखि ओमानमा हुने एसीसी प्रिमियर कप टी–२० क्रिकेट प्रतियोगिताको तयारीका लागि भारत भ्रमण गरेको हो। एसिया कप छनोटको आधारका रुपमा रहेको प्रिमियर कपमा नेपाल विजेताको लक्ष्यमा रहेको छ।

प्रिमियर कपको विजेताले टी–२० विश्वकपपछि हुने एसिया कप खेल्न पाउने छ। नेपाल भारतबाटै ओमान प्रस्थान गर्ने कार्यतालिका रहेको छ।