धनगढी । कैलालीको धनगढी उपमहानगरपालिकाले दुई सय ८६ सामुदायिक (छाडा छोडिएका) कुकुरको बन्ध्याकरण गरेको छ । उपमहानगरपालिकाले दुर्घटनालाई न्यूनीकरण गर्नका लागि सामुदायिक कुकुरको बन्ध्याकरण गरेको हो ।

सामुदायिक कुकुरका कारण समस्या सिर्जना भएपछि उपमहानगरपालिकाले नियन्त्रणका लागि बन्ध्याकरण गरेको बताएको छ । उपमहानगरपालिकाले केही वर्षदेखि सामुदायिक कुकुर नियन्त्रण अभियान सञ्चालन गर्दै आएको छ ।

सामुदायिक कुकुरले गर्दा दुर्घटना र रेविज रोग लाग्ने भएकाले बन्ध्याकरणका साथै रेविजविरुद्धको खोप लगाइएको हो । सामुदायिक कुकुर नियन्त्रणका लागि बन्ध्याकरण सबैभन्दा प्रभावकारी उपाय रहेको बताइएको छ ।

उपमहानगरपालिकाले यही चैत्र १७ गते आइतबारदेखि बुधबारसम्म सामुदायिक कुकुर बन्ध्याकरण शिविर सञ्चालन गरेको थियो ।

चार दिनसम्म सञ्चालन भएको शिविरमा १५८ पोथी र १२८ भाले गरी दुई सय ८६ वटा सामुदायिक कुकुरको बन्ध्याकरण गरेको जनाइएको छ । धनगढीमा कुकुरको संख्या धेरै भएकाले बन्ध्याकरण गरिएको हो ।

उपमहानगरपालिका पशुसेवा शाखा प्रमुख डाक्टर समीरकुमार ठाकुरले चार दिनसम्म चलेको शिविरमा छाडा छोडिएका कुकुरहरूको मात्र बन्ध्याकरण गरिएको थियो ।

छाडा छोडिएका कुकुरहरूको संख्या नियन्त्रण गर्न उपमहानगरपालिकाले हरेक वर्ष बध्याकरण शिविर आयोजना गर्दै आएको पशुसेवा शाखा प्रमुख ठाकुरले बताए ।

सामुदायिक कुकुरको बिगबिगीका कारण मानिसमा रेविजको संक्रमण हुने, सडक दुर्घटनामा बृद्धि हुने तथा फोहर दूर्गन्ध बढ्ने लगायतका समस्या कम गर्न नियन्त्रणको प्रयास हुँदै आएको छ ।

पशुसेवा शाखा प्रमुख डाक्टर ठाकुरले काठमाण्डौंको मण्डला भेटेनरी अस्पतालको प्राविधिक सहयोग र धनगढी उपमहानगरपालिकाको आर्थिक सहयोगमा बन्ध्याकरण शिविर सञ्चालन गरिएको हो ।

धनगढीमा बिहानको समयमा सामुदायिक कुकुरले टोक्ने तथा लखेट्ने जोखिम रहेको उपमहानगरपालिकाले जनाएको छ । बन्ध्याकरणले सामुदायिक कुकुरको संख्या घटाउने जनाएको छ ।

शिविरमा खटिएको विज्ञसहितको टोलीले नगरको टोल–टोलमा पुगेर कुकुरलाई नियन्त्रणमा लिई शिविर स्थलमा ल्याइ बन्ध्याकरण लगायत उपचार गरेपश्चात नियन्त्रण लिइएको स्थानमै छाडिएको डाक्टर ठाकुरले बताए ।