घोडाघोडी । एक एक गरी जोडेको धन अर्कैले खाएर भागेपछि घोडाघोडी नगरपालिका–१, घोडाघोडीगाउँकी राधिका कार्की विक्षिप्त अवस्थामा पुग्नुभएको छ । 

विसं २०७९ मा २३ लाख रुपियाँ खर्चेर किनेको जग्गा विश्वासका भरमा समयमै पास गरेर नलिँदा अहिले उहाँलाई पछुतो भएको छ । राधिकालाई जग्गा बेचेर एक वर्षपहिला रकम बुझिसकेको जग्गा थप अरू दुई जनालाई बेचेर फरार भएकी मीना शाहको अहिले खोजी भइहेको छ ।

मीना र राधिका एकै ठाउँका छिमेकी हुन् । शाहसंग घोडाघोडीमै रहेको एक कट्ठा जमिन २०७९ साल वैशाखमा आफूले किनेको राधिका बताउनुहुन्छ । विभिन्न समयमा किस्ता किस्ता गरे २३ लाख ७६ हजार रुपियाँ बुझाए पनि बैङ्कमा जग्गा भएका कारण दुई वर्ष बित्दासम्म राधिकाको नाममा जग्गा पास भएको थिएन । एकै ठाउँको मान्छे दुःखसुखमा काम लाग्ने भन्दै राधिकाले जग्गाको पूरै रकम बुझाउँदासमेत कुनै लिखत नगरेको बताउनुभयो ।

साना किसान सहकारीमा काम गर्ने मीनाले राधिकालाई बेचेको जग्गा अरूलाई नै बेचेर बेखबर भएपछि राधिकाको होसहवास उडेको छ । राधिका भन्नुहुन्छ, “मैले ठेला व्यवसाय गरेर पाई पाई जोडेको पैसा हो, २९ किस्ता त बैङ्कमा बुझाएको छु । साना छोराछोरी काखमा च्यापेर ठेलामै रात गुजारी कमाएको रकम जग्गामा लगाएँ । मैले विश्वास गरेर कागज पनि गरिनँ ।”

राधिकाका श्रीमान् अटो चलाउनुहुन्छ । राधिकाले घोडाघोडीमै सानो पसल चलाउनुभएको छ । दुःखसुख गरेर ओत लाग्ने घर बनाउने सपना बनाउँदै राधिकाले जग्गामा पैसा लगाउनुभएको थियो । आफूले किनेको जग्गा अरू दुई जनालाई बेचेको खबरसँगै राधिकाको आँखामा आँसुको भेल बगेको छ । रुँदै उहाँ भन्नुहुन्छ, “प्रहरीकहाँ उजुरी गर्न गएको प्रमाण छैन भन्दै निवेदन नै लिएन । आधा रकम नगद दिए । आधा रकम उसको बैङ्कमा भएको ऋण तिर्न किस्ता बुझाएँ । घरजग्गा परिवार सबै भएको मान्छे, यसरी घात होला भन्ने लागेन ।”

मीनाले राधिकालाई बेचेको जग्गा पहलमानपुरका सन्तोषी रोकायालाई बेचेर राजीनामा पास दिइसकेकी रहिछन् । सन्तोषीलाई पास दिनुअघि सोही जग्गा मसुरियाका मीनाकै नाता पर्ने पार्वती कठायतलाई बेचेर पाँच लाख रुपियाँ बैना बुझेको बताइन्छ ।

जग्गाको बैनाका लागि पाँच लाख रुपियाँ बुझाएर मङ्सिरमा जग्गा पास दिने भनेपछि पार्वती दोस्रो पटक जग्गा हेर्न घोडाघोडी आएको बताउनुहुन्छ । उहाँ भन्नुहुन्छ, “पहिलो पटक आउँदा कसैले केही भनेन । २० लाख रुपियाँमा जग्गा किनबेच सहमति भएको थियो । पाँच लाख रुपियाँ बैना बुझाएँ । दोस्रो पटक जाँदा जग्गा अरूलाई नै बेचेको थाहा पाएँ ।” उहाँले रकम मीनाको बैङ्क खातामा हालेको प्रमाणसहित प्रहरीकहाँ निवेदन दिएको जनाउनुभयो ।