साफ सेमिफाइनलमा भारतसँग भिड्दै नेपाल, घरेलु मैदानमा इतिहास रच्ने अवसर

३१ भदौ २०७९, शुक्रवार

काठमाडौं, ३१ भदौ । साफ महिला च्याम्पियनसिप २०२२ को सेमिफाइनलमा आज नेपाल र भारत भिड्दैछन् । सन् २०१० देखि सुरु भएको महिला साफको यो छैठौं संस्करण हो ।

यसअघिका पाँच मध्ये चार संस्करणमा नेपाल फाइनलमा भारतसँगै पराजित हुँदै उपविजेतामै सीमित भएको थियो भने एक संस्करण भारतको सिलिगुडीमा आयोजना भएको चौथो संस्करणको सेमिफाइनलमा पनि नेपाल भारतसँगै स्तब्ध भएको थियो ।

जतिबेला नेपालको प्रशिक्षण कुमार थापाले सम्हालेका थिए । संयोेगबस नेपालले यसपटक पनि सेमिफाइनलमा भारतसँगै प्रतिस्पर्धा गर्दैछ र नेपालको प्रशिक्षणको जिम्मेवारी पनि थापा माथिनै रहेको छ ।


त्यसबेला भारतको घरेलु मैदानमा सेमिफाइनल हारेर घर फर्किएको नेपाली टिम यसपटक आफ्नो घरेलु मैदानमा भारतलाई हराएर फाइनल पुग्ने लक्ष्यमा छ ।

नेपाली टिमका मुख्य प्रशिक्षक कुमार थापा भन्छन्,‘यसपटक भारतलाई हामी हाम्रो मैदानमा हराएर फाइनल जित्छौं । साफको ट्रफी घरमै राख्छौं । हामी त्यो खराब इतिहासलाई दोहोरिन दिँदैनौं । नयाँ इतिहास बनाउँछौं । त्यसका लागि म र मेरा खेलाडी पक्कै पनि तयार छन् ।’

थापाले भने जस्तै घरेलु मैदान र दर्शकबीच सँधै उपाधि यात्रामा तगारो बनेको भारतलाई पन्छ्याउने नेपालसामु ठूलो अवसर छ । तर, टिमकी मुख्य खेलाडी साबित्रा भण्डारी अनुपस्थित हुनसक्ने सम्भावनाले भने नेपाललाई केहि हदसम्म गाह्रो हुन सक्नेछ ।

समूह चरणमा श्रीलंकासँगको खेलको एकदिन अघीदेखि डेंगु पुष्टि भएपछि सावित्राले श्रीलंकाविरुद्धको खेल गुमाएकी थिइन् । डेंगु संक्रमण भएका कारण उनले खेल्ने वा नखेल्ने अझै टुङ्गो लागेको छैन ।

जारी प्रतियोगितामा सात टीमलाई दुई समूहमा विभाजन गरिएको थियो ।

Share This:
No News Were Available