डोटी । डोटीमा एक सुत्केरी महिलाको हेलिकप्टरमार्फत उद्धार गरिएको छ । आदर्श गाउँपालिका–१ बाँझकी २३ वर्षीया सुत्केरी मुना श्रीमाललाई बिहीबार उद्धार गरी कर्णाली प्रादेशिक अस्पताल सुर्खेत पठाइएको हो ।

जिल्ला प्रहरी कार्यालय डोटीका अनुसार बिहीबार आठ महिनाकी गर्भवती श्रीमाललाई सुत्केरी व्यथा लागेपछि उपचारका लागि सुजङ अस्पताल राजपुर डोटी लगिएको थियो ।

अस्पतालमा उपचारका क्रममा मृत्यु भएको बच्चा जन्मिएको र आमाको स्वास्थ्य अवस्था बेहोस भई जटिल बनेपछि राष्ट्रपति महिला उत्थान कार्यक्रमअन्तर्गत नेपाल सरकार महिला, बालबालिका तथा ज्येष्ठ नागरिक मन्त्रालयको पहलमा हेलिकप्टरमार्फत उद्धार गरिएको जिल्ला प्रहरी कार्यालयले जनाएको छ ।