धनगढी । कैलालीको कैलारी गाउँपालिकास्थित सप्तरङ्गी लघुउद्यमी समूहका महिलालाई ढकिया लगायतको हस्तकलाका सामग्री बनाउन भ्याइ नभ्याई भएको छ । 

परम्परागत सीपबाट बनाइएको ढकिया, डेलुवा, डोकोलगायतको सामग्रीका व्यापार चम्केपछि उनीहरुलाई त्यस्ता सामग्री बनाउन भ्याइ नभ्याइ भएको हो । उद्यमी महिलाले हस्तकलाका सामग्री उत्पादन गरेर काठमाडौंं पठाउने गरेका छन् । फुटकरभन्दा पनि थोक व्यापार राम्रो रहेको हस्तकला उद्यमी कैलारी गाउँपालिका –३ भर्रीका सञ्जिता चौधरीले बताईन । 

जङ्गल, नदी, खोला किनारमा पाइने काँसलगायतको वस्तुबाट महिलाले हस्तकलाका सामग्री बनाउनेगरेका छन् । यस्ता सामग्रीको माग बढेपछि दिनभरी र फुर्सदको बेला राति पनि बनाउने काम भइरहेको चौधरीको भनाइ छ । उनीले छ जनाले यो काम गरिरहेको जानकारी दिइन् । 

काँसलगायतको वस्तु प्रयोग गरेर थारु समुदायका महिलाले ढकियासहित विभिन्न किसिमको हस्तकलाका सामग्री बनाउँदै आएका छन् । सानैबाट सिकेको सीपलाई अब व्यवसायमा परिणत गरेको जनाउँदै समूहका फूलकुमारी चौधरीले कामको दाम पनि राम्रो रहेका बताईन् । 

ढकिया, डेलुवा, डोकोलगायतको सामग्री बढी उत्पादन गर्न सक्नेले अझ बढी आम्दानी गरिरहेको उनीको भनाइ छ । “आफूले जति धेरै सामग्री बनाउन सक्यो त्यति नै धेरै आम्दानी हुन्छ”, चौधरीले भनीन्, “यसमा खर्च खासै छैन, मिहिनेत चाहिन्छ ।” परम्परागत सीपबाट तयार पारिएकोे सामग्रीको व्यापारले महिलालाई आत्मनिर्भर बन्न सहयोग पुग्ने स्थानीय सुनिता चौधरीको विश्वास छ । उनीले यस्ता कार्यले गरिबी निवारणमा पनि टेवा पुग्ने उल्लेख गरीन् ।